Aanichatti Manneen barnootaa 93 jiran keessaa Afur(4) qofti tajaajila kennaa jiraachuu Kan himan jiraattootni Oromia11 dubbise; Manneen yaalaa dabalatee Tajaajjilli hawaasummaa kamuu haala walfakkaataa keessa jira jedhan.
Jiraattuun Aanichaa sababa rakkoo nageenyaatiif Maqaan ishii akka hin eeramne gaafatte Aanichatti waggoota 5’n darbaniif adeemsi baruuf barsiisuu haala guutumaa guututti jedhamuu danda’uun addaan cituu himti.
Aanaa Darraa Manneen barnootaa gandoota iluu waayyuu, baabbuu Dirree , Dirree Odaa fi Kanneen birootti manneen barnoota 93 kessaa manneen barnoota afur (4) qofti tajaajila kennaa jiraachuu ibsiti.
Manneen barnoota kunneenis magalaa Gundoomasqalii fi Saalish keessatti qofa tajaajila kennaa jiraachuu kan himan jiraatoonni Naannolee gandoota baaddiyaatti barattootni guutumatti barnoota dhabanii akka jiran himan.
Maddeen Aanichaa Amanamoon biroos akka himanitti manneen barnootaa kunneen waggoota 5’f dalagaan ala tahuu hordofee meeshaaleen barnootaa kanneen akka gabatee, teessoo barattootaa , gola barnootaafi kanneen biroos suphamaa fi hordoffii gahaa dhabuun sadarkaa tajaajila kennuu hin dandeenne irra jiraachu himan.
Itti dabaluunis Miindaan barsiisotaa hanga ammaatti seeraan kennamaa jiraachuu kan eeran maddeen; haa ta’uu malee dirqama ogummaa isaani bahaa hin jiran jedhu.
Biyyi takka lammii baratee biyya ijaaruu danda’u horachuuf ka’uumsi jalqabaa haalota barnootaaf ta’an kanneen akka manneen barnootaa qabaachuun isa ijoodha jedhan.
Haa ta’uu malee baratoonni keenna daftaraa fi qalama lafa kaayanii doofummaa keessaatti guddataa jiru jedhan.
Dhimma kanaan wal-qabatee Waajjira barnoota fi Hooggantoota mootummaatti komii dhiyeeffannus rakkoon keenna furmaata argachuu hin dandeenne jedhan.
Qaamoleen dhimmi kun ilaallatu dhimma kana xiyyeeffannoo keessa galchanii ilaaluu qabu jechuun jiraattonni gaafataa jiru.
Godina salalee Aanaa Dharraatti Wali-Waraansi hidhattoota Mootummaa, Hidhatoota WBO fi hidhattoota Faannoo giddutti irra deddeebiin adeemaa jiru haalli nageenya naanichaa yeroo irraa gara yerootti yaaddessaa ta’aa jiraachu ragaaleen bahaa jiran ni muldhisu.
OUUN TAN AYAANTU ABDITI
