Naannoo Oromiyaa godina Horroo Guduruu Wallaggaa aanaa Abee Dongoroo ganda Tulluu Mootii jedhamu keessatti dhuma torban darbe Bitootessa 28, 2025 haleellaa hidhattoonni Faannoo raawwataniin jiraattonni 20 ol yoo ajjeefaman, namoonni sadi hidhattootaan butamuu aanga’aa fi jiraattoonni himan.
Jiraattoonni,aanaa Abee Dongoroo sodaa nageenyaa irraa ka’uun maqaan isaa akka hin dhahamne gaafate
Oromia11 dubbise akka himanitti, haleellaa Jimaata darbe raawwatame kanaan namoonni 20 ol ta’an kan ajjeefaman yoo ta’u hedduun ammoo “madaa’anii haala ulfaataa keessa akka jiran” himu.
Itti dabaluunis dhukaasa qaama nageenyaa bira darbee namoota nagayaa irratti baname kanaan yoo xiqqaatee namoonni 20 “haala suukkanneessaan” ajjeefamuu himani jiru.
Jiraataan gandichaa namoota ajjeefamanii keessaa miseensa maatii nama tokko kan ta’eefi maqaan isaa akka hin dhahamne gaafate biraa gama isaatiin, “hanga ammaatti maaltu akka ta’e nuuf hin galle osoo karaa deemaa jiruu ajjeefame jechun dubbata
Bulchaa Itti aanaan Aanaa Abee Dongoroo Obbo Ayyaanaa Waaqee dhimma kana ilaalchisee yaada Addis Standard’tti laataniin, haleellaa “hidhattoonni finxaaleeyyii Faannoo raawwataniin” guyyuma tokkotti namoonni 20 ajjeefamuu mirkaneessan
Hidhattoonni maqaa Faannoo jedhuun of gurmeessan kun yeroo waraanni Raayyaa Ittisa Biyyaa naannoo kanatti dhufu “baqachuudhaan bosona keessa galanii akka dhokatan” kan eeran Obbo Ayyaanaan, garuu yeroo Raayyaan Ittisa Biyyaa naannoo kanarraa ka’uun dabareen eegumsaa kan humna addaa Oromiyaa fi milishaa ta’u “itti marsuun dhukaasa banu” jedhan.
