Caamsa 23/2022 Humnoonni Mootummaa: Milishaa, Kaabinee fi Polisii Oromiyaa dabalatee Magaalaa Guddoo Aanaa Habaaboo Guduruu irraa ka’uun gara Ganda Biftuun Nuuf Baatee deemanii turan.
Imalli qaamoota mootummaa kun Ummata ganda sanaa keessaa namoota adda baasanii gara Leenjii Milishaatti geessuuf kan akeekate yoo tahu, namoota Magaala Qubsaa keessaatti argatan waliitti qabuun Mana Barumsaa Sadarkaa 1ffaa Qubsaa keessaa geessanii halkan tokkof achi kan bulan tahu jiraatan Oromia11 dubbise ibseera.
Akkuma odeeffannoo kun dhagahameen, odeessi WBO dhaqqabe. Waraanni Bilisumma Oromoo Caamsaa 24 iddoo sana dhaqqabe, battaluma eddoo sana gaheen leenjitoota haara dhufaniif dhamsa sagalee gudistuudhaan akka gara isaaniitti baqatan yaamicha taasise.
Ji’a tokko oliif maqaa duula oppereeshinii WBO dhabamsiisuu jedhu gaaggeessa kan jiran humnootni mootumma guyyaa kaleessaa (Caamsaa 24/2022) ganama keessaa sa’aa 12:00 (6:00AM) keessaa bakka mana barumsaa Qubsaa jiraanitti WBO’n walitti dhukaasa eegalan.
Namootni baay’een harka qullaa lubbuu ofii baraaruuf gara WBOtti baqaachuu jalqabanii jennaan Milishaa, Kabineefi Polisiin Oromiyaa namoota isaan jalaa baqachuu jalqaban irratti dhukaasa bananii ummanni nagaan lubbuun nama 8 kan darbe tahuu jiraataan kun dabaluun nuuf himee jira.
Haleellaa jabaa WBO’n humnoota mootumma kanarratti fudhateen baay’ee kan rifatan qondaltoonni Humna Raayya Ittisa Biyyaa, Poolisii Federaalaa fi Polisoota Oromiyaa akkasumas Milishaa gandaa bobbaasuun humnootni kunneen walumaa galatti yoo xiqqate namoota nagaa 20 ol haloo WBO irratti bahuuf kan ajjeessan tahuu jiraattonni ibsaniru. Keessaattu humni RIB namoota daandii Magaalatti irratti argan daa’ima, dubartii, manguddoo osoo hin filatiin jumlaan ajjeessa akka turan duubbatan.
Yeroo ammaas Hawaasni Magaalattii gidiraa humnootni mootumma waloon raawwachaa jiran baqachuun gara gandeen badiyyaa dhiheenyaatti jiranitti godaanaa jiraachuus himaniru.
